ભારતીય મહિલા ક્રિકેટ ટીમની અનુભવી અને આધારસ્તંભ બેટર પૂનમ રાઉતે સત્તાવાર રીતે આંતરરાષ્ટ્રીય ક્રિકેટના તમામ ફોર્મેટમાંથી નિવૃત્તિની જાહેરાત કરી દીધી છે. ૩૭ વર્ષીય પૂનમ રાઉતે વર્ષ ૨૦૦૯ માં ભારતીય ટીમ તરફથી આંતરરાષ્ટ્રીય ક્રિકેટમાં પદાર્પણ કર્યું હતું અને એક દાયકાથી વધુ સમય સુધી ત્રણેય ફોર્મેટમાં દેશનું પ્રતિનિધિત્વ કરીને મહત્વપૂર્ણ યોગદાન આપ્યું હતું. તેમણે પોતાની છેલ્લી આંતરરાષ્ટ્રીય મેચ જૂન ૨૦૨૧ માં ઇંગ્લેન્ડ સામે રમી હતી. પોતાની નિવૃત્તિની લાગણીસભર જાહેરાત કરતી વખતે તેમણે મુંબઈની શેરીઓથી શરૂ કરીને ભારતીય ટીમની જર્સી પહેરવા સુધીની પોતાની સફરને ગર્વ અને સન્માનની ક્ષણ ગણાવી હતી અને ભવિષ્યમાં પણ ક્રિકેટ સાથે જોડાયેલા રહેવાની ઈચ્છા વ્યક્ત કરી હતી.
પૂનમ રાઉતની કારકિર્દીની સૌથી યાદગાર ક્ષણ વર્ષ ૨૦૧૭ ના મહિલા વિશ્વકપ દરમિયાન જોવા મળી હતી. લોર્ડ્સના ઐતિહાસિક મેદાન પર રમાયેલી ફાઇનલ મેચમાં તેમણે ઇંગ્લેન્ડ સામે લડાયક ૮૬ રન બનાવ્યા હતા, જોકે ભારત માત્ર નવ રનથી વિશ્વ વિજેતા બનવાથી ચૂકી ગયું હતું. આ જ ટૂર્નામેન્ટમાં તેમણે આયર્લેન્ડ સામે શાનદાર સદી ફટકારીને દીપ્તિ શર્મા સાથે પ્રથમ વિકેટ માટે ૩૨૦ રનની ઐતિહાસિક ભાગીદારી નોંધાવી હતી. આ ઉપરાંત, વર્ષ ૨૦૨૧ માં ઓસ્ટ્રેલિયા સામેની ગુલાબી બોલની ટેસ્ટ મેચમાં અમ્પાયરે નોટઆઉટ આપ્યા છતાં, બોલ બેટની કિનારીને અડીને ગયો હોવાની ખાતરી થતાં પોતે જ પેવેલિયન તરફ પરત ફરીને તેમણે ક્રિકેટ જગતમાં ખેલદિલી અને નૈતિકતાનું ઉત્તમ ઉદાહરણ પૂરું પાડ્યું હતું.
તેમની આંતરરાષ્ટ્રીય કારકિર્દીના આંકડા પણ તેમની પ્રતિભાની સાક્ષી પૂરે છે. પૂનમ રાઉતે ભારત માટે ૭૩ વનડે મેચમાં ૩૪.૮૩ ની સરેરાશથી ૨,૨૯૯ રન બનાવ્યા હતા, જેમાં ૩ સદી અને ૧૫ અડધી સદી સામેલ છે. ટ્વેન્ટી-૨૦ આંતરરાષ્ટ્રીય ક્રિકેટમાં તેમણે ૩૫ મેચોમાં ૭૧૯ રન બનાવ્યા હતા અને ૪ અડધી સદી નોંધાવી હતી. જ્યારે ૪ ટેસ્ટ મેચમાં તેમણે ૪૪.૦૦ ની સરેરાશથી ૨૬૪ રન બનાવ્યા હતા, જેમાં વર્ષ ૨૦૧૪ માં દક્ષિણ આફ્રિકા સામે ફટકારેલી એક શાનદાર સદીનો પણ સમાવેશ થાય છે. પોતાની વિદાય વેળાએ તેમણે જણાવ્યું કે આ રમતે તેમને ઓળખ અને જીવનનો હેતુ આપ્યો છે અને હવે તેઓ આ રમતને કંઈક પરત આપવા માટે પોતાની નવી ઇનિંગ્સ શરૂ કરશે.
