ઉત્તર પ્રદેશના જાણીતા વેપારી શિવા શર્માના રહસ્યમય મોત અને કથિત હત્યા કેસમાં મોટો ઘટસ્ફોટ થયો છે. આ ચકચારી પ્રકરણમાં મુખ્ય આરોપી તરીકે નામચીન બનેલી મોડેલ શ્રદ્ધા દુબે કાયદાની પકડમાંથી બચવા માટે સરહદ વટાવીને પડોશી દેશ નેપાળ પહોંચી ગઈ હોવાની પ્રબળ સંભાવના છે. તપાસ દરમિયાન પોલીસને હાથ લાગેલા સીસીટીવી ફૂટેજમાં શ્રદ્ધા દુબે પોતાની બહેન રશ્મિ અને સાથીદાર આદિલ સાથે નેપાળમાં જોવા મળી હોવાની માહિતી સામે આવી છે. લખનઉમાં વેપારીના મોતની ઘટના બન્યાના ગણતરીના કલાકોમાં જ આ ત્રણેય આરોપીઓ ફરાર થઈ ગયા હતા, જેનાથી તેમના પરનો સંશય વધુ ઘેરો બન્યો છે.
આ સનસનાટીભર્યા મામલામાં મૃતક શિવા શર્માના પરિવારે સ્પષ્ટપણે હત્યાનો આક્ષેપ કર્યો છે. પરિવારજનોનું કહેવું છે કે શિવાનું મોત સામાન્ય કે આત્મહત્યા નથી પરંતુ તેની પાછળ એક મોટું ષડયંત્ર છે. બીજી બાજુ, મોડેલ શ્રદ્ધા દુબે પોતાને સતત નિર્દોષ ગણાવી રહી છે અને તેણે દાવો કર્યો હતો કે શિવા શર્માએ ગળેફાંસો ખાઈને આત્મહત્યા કરી છે. જોકે, જો તે નિર્દોષ હતી તો પછી પોલીસ સમક્ષ હાજર થવાને બદલે અચાનક ફરાર કેમ થઈ ગઈ, તે સવાલ હવે તપાસ એજન્સીઓ માટે સૌથી મહત્વનો બન્યો છે.
આ કેસની ગંભીરતાને ધ્યાને રાખીને સ્થાનિક પોલીસ ઉપરાંત સ્પેશિયલ ટાસ્ક ફોર્સ દ્વારા પણ આરોપીઓને પકડવા માટે ચક્રો ગતિમાન કરવામાં આવ્યા છે. આરોપીઓ નેપાળમાં છુપાયા હોવાની બાતમી મળતાં હવે આંતરરાષ્ટ્રીય કાયદાકીય માળખા અને સરહદી સુરક્ષા દળોની મદદ લેવાની કવાયત હાથ ધરાઈ છે. પોલીસ અધિકારીઓના જણાવ્યા મુજબ, નેપાળમાં આરોપીઓના સંભવિત ઠેકાણાઓ પર નજર રાખવામાં આવી રહી છે અને ટેકનિકલ પુરાવાઓને આધારે ટૂંક સમયમાં ત્રણેય આરોપીઓની ધરપકડ કરીને તેમને પરત લાવવામાં આવશે. આ હાઈપ્રોફાઈલ કેસના કારણે સમગ્ર વિસ્તારમાં ભારે ચર્ચા જાગી છે.
