પોલીસ મહાનિરીક્ષક અને પોલીસ અધિક્ષકની સીધી સૂચના હેઠળ શહેરના સંવેદનશીલ વિસ્તારોમાં મધરાતે મેગા સર્ચ ઓપરેશન: પ્રોહીબીશન, હથિયારબંધી અને શંકાસ્પદ ઈસમો સામે લાલ આંખ
રાજકોટ વિભાગના પોલીસ મહાનિરીક્ષક અશોકકુમાર તથા જામનગર જીલ્લા પોલીસ અધિક્ષક ડો. રવિ મોહન સૈની દ્વારા જીલ્લામાં કાયદો અને વ્યવસ્થાની પરિસ્થિતિને વધુ સુદ્રઢ બનાવવા તેમજ અસામાજિક તત્વોમાં કાયદાનો ડર ઉભો કરવાના ઉદ્દેશ્યથી એક મહત્વપૂર્ણ રણનીતિ ઘડી કાઢવામાં આવી હતી. આ ઉચ્ચ અધિકારીઓની સીધી સૂચના અને માર્ગદર્શન હેઠળ જામનગર જીલ્લાના માથાભારે શખ્સો, હિસ્ટ્રીશીટરો, પ્રોહીબીશનના બુટલેગરો, નાસતા ફરતા આરોપીઓ તેમજ મિલકત અને શરીર સબંધી ગુનાઓમાં સંડોવાયેલા ઈસમોને શોધી કાઢવા માટે તા. 25/11/2025 ના રોજ એક ખાસ ‘સ્પેશ્યલ કોમ્બિંગ ડ્રાઇવ’નું આયોજન કરવામાં આવ્યું હતું, જેમાં ખાસ કરીને જામનગર સીટી સી ડિવિઝન પોલીસ સ્ટેશન હેઠળ આવતા બાવરીવાસ, હનુમાન ટેકરી, જાગૃતિનગર, ગણપતનગર, વુલનમીલ ફાટક અને રેલ્વે પાટા જેવા અત્યંત સંવેદનશીલ અને ગીચ વિસ્તારોને આવરી લઈને ગુનેગારો પર ધોંસ બોલાવવામાં આવી હતી.
આ વિશાળ અને વ્યાપક કોમ્બિંગ ડ્રાઇવની કામગીરી નાયબ પોલીસ અધિક્ષક જયવિરસિંહ ઝાલાના પ્રત્યક્ષ સુપરવિઝન હેઠળ પાર પાડવામાં આવી હતી, જેમાં પોલીસ બેડાના વિવિધ વિભાગોનો એક મજબૂત કાફલો મેદાનમાં ઉતારવામાં આવ્યો હતો. આ ઓપરેશનમાં એલ.સી.બી., એસ.ઓ.જી., પેરોલ ફર્લો સ્કવોડ ઉપરાંત સીટી એ, બી, અને સી ડિવિઝન પોલીસ સ્ટેશન, બેડી મરીન પોલીસ સ્ટેશન તથા મહિલા પોલીસ સ્ટેશનના પોલીસ ઇન્સ્પેક્ટરો અને સબ-ઇન્સ્પેક્ટરો સહિતની ટીમો જોડાઈ હતી. કુલ 6 પોલીસ ઇન્સ્પેક્ટર, 15 પોલીસ સબ-ઇન્સ્પેક્ટર અને આશરે 150 જેટલા પોલીસ કર્મચારીઓના વિશાળ કાફલાએ આધુનિક ડોગ સ્કવોડની મદદથી રાત્રિના સમયે શંકાસ્પદ સ્થળો ખૂંદી વળ્યા હતા અને શહેરના ખૂણેખૂણે સઘન ચેકિંગ હાથ ધરીને અસામાજિક પ્રવૃત્તિઓ આચરતા તત્વોમાં ફફડાટ ફેલાવી દીધો હતો.પોલીસ તંત્ર દ્વારા હાથ ધરવામાં આવેલી આ આક્રમક કાર્યવાહીના પરિણામો પણ ત્વરિત અને ચોંકાવનારા જોવા મળ્યા હતા, જેમાં કાયદાના ભંગ બદલ અનેક કેસો દાખલ કરવામાં આવ્યા હતા.
આ ડ્રાઇવ દરમિયાન દારૂની બદીને ડામવા માટે કરાયેલી કડક કાર્યવાહીમાં પ્રોહીબીશનના કુલ 35 કેસો નોંધવામાં આવ્યા હતા, જ્યારે જી.પી. એક્ટની કલમ 135 ભંગ બદલ હથિયાર ધારાના 6 કેસો કરીને કાયદાનો સકંજો કસવામાં આવ્યો હતો. આ ઉપરાંત, મિલકત સબંધી ગુનાઓમાં અગાઉ પકડાયેલા 63 એમ.સી.આર. ઈસમો, 12 માથાભારે શખ્સો, 7 અસામાજિક તત્વો અને 4 ટપોરીગીરી કરતા ઈસમોને શોધીને તેમનું સઘન ચેકિંગ કરવામાં આવ્યું હતું, જેથી ભવિષ્યમાં કોઈ પણ પ્રકારની ગુનાહિત પ્રવૃત્તિ આચરતા પહેલા તેઓ સો વાર વિચાર કરે તેવો માહોલ ઉભો કરવામાં આવ્યો છે.માત્ર ગુનેગારોની ધરપકડ જ નહીં, પરંતુ ભવિષ્યના ગુનાઓ અટકાવવા માટે પણ આ ડ્રાઇવમાં પૂરતી તકેદારી રાખવામાં આવી હતી, જેના ભાગરૂપે શહેરના 32 પ્રોહી બુટલેગરો અને 14 જાણીતા જુગારીઓના ઠેકાણાઓ પર દરોડા પાડવામાં આવ્યા હતા.
શહેરની સુરક્ષા વ્યવસ્થાને ધ્યાનમાં રાખીને 4 જેટલી અવાવરુ જગ્યાઓ અને ઝૂંપડપટ્ટી વિસ્તારો ઉપરાંત 19 હોટલ, ધાબા અને ધાર્મિક સ્થળોનું પણ ઝીણવટભર્યું ચેકિંગ હાથ ધરવામાં આવ્યું હતું. રસ્તાઓ પર કાયદાનું પાલન કરાવવા માટે 178 વાહનોનું ચેકિંગ કરીને ટ્રાફિક નિયમન અને શંકાસ્પદ હિલચાલ પર નજર રાખવામાં આવી હતી, આમ આ સમગ્ર ઓપરેશન દ્વારા જામનગર પોલીસે પ્રજાની સુરક્ષા અને શાંતિ માટે પોતાની કટિબદ્ધતા ફરી એકવાર સાબિત કરી દીધી છે.
